مصنع حروف

لما تتكلم من غير ما تفهم

العقل قوام بيخلع

تمام زى ما تنطق ...من غير ما تسمع

وتبقى مصنع حروف ... كما الخروف

بيصرخ ماء .. ماء ......لحد الإنتهاء

ولايدرى ... إن فى نداه .. سر الإرتواء..

وتصرخ م التخمة يا شبعان ...

وتتلوى م الجوع يا فقران ...

ما إنت مصنع حروف ........ كما الخروف

عمال ترص فى كلام ... يتشال بالجروف

ونسيت تسأل نفسك فى الهوان

هو إنت يا .. بنى آدم إنسان ..

ولا مجرد ......حتت بغبغان ...

**********

فى كل مُشكل ... عمال تتكلم

تتلون .. تفتى ...هيلا .. هوب

وتضرب ...كرسى فى الكلوب

ولما تتزنىء فى ركن .. زى الفار ......بتطب

وتدور فى راسك على حجة م الظروف

ما تلاقيش غير لحمة راس وفص مخ بالليمون

 ما إنت مصنع حروف ........ كما الخروف

عمال ترص فى كلام .... يتشال بالجروف

زى اللى عاشق تخاطيف .. إسبتالية المهافيف

ونسيت تسأل نفسك فى الهوان

هو إنت يا ... بنى آدم إنسان ..

ولا مجرد ........حتت بغبغان ...

**********

عارف إن المخ عندك ...سندوتشات

والبت فى نظرك ....... إستريتشات ..

والحلم فى قلبك ..... صفحة وفيات ..

والكلام عندك هزل ... والجنون أذل ...

والتخاريف معاك لزمة .. والدماغ جزمة ..

والوطن وياك محنة ..... والثورة أزمة ...

ما إنت مصنع حروف ........ كما الخروف

عمال ترص فى كلام ..... يتشال بالجروف

باصص يعيون جبانة ... وفى كل حرف خيانة

ونسيت تسأل نفسك فى الهوان

هو إنت يا ......بنى آدم إنسان ..

ولا مجرد ..........حتت بغبغان ...

**********

الوطن مش أكلة فته وزفر

والفُرْقة مش جرة قلم ... يا بجم

هتصحى ........ ولا هتموت بقلب بقر

هتفوق .. ولا ناوى تكملها نفوق

صدقنى ما عدتش تفرق ..

ما إنت مصنع حروف ....... كما الخروف

عمال ترص فى كلام ... يتشال بالجروف

ونسيت تسأل نفسك فى الهوان

هو إنت يا ........بنى آدم إنسان ..

ولا مجرد ............حتت بغبغان ...

**********


عودة للصفحة الرئيسية ( إضغط هنا )